As sociedades agrarias de transformación

Abstract

Introdución: Nos últimos anos, e en parte pola melloras das comunicacións, tanto físicas como dixitais,e tamén polo cambio de concepción da actividade do sector primario, comprobase un maior interese en potenciar a produción agrícola, gandeira e forestal na nosa Comunidade Autónoma. O anterior persigue alo menos tres obxectivos: a revitalización do eido rural, o que sen dubida favorecera a repoboación para combater o problema da “España vaciada” (Vaquero e Losa, 2020; Vaquero, 2021); acadar unha explotación responsable, seguindo as directrices marcadas polos Obxectivos de Desenvolvemento Sostible (ODS) das Nacións Unidas NU), dentro dunha contorna que garanta un maior aproveitamento dos recursos locais tan presentes nas actividades agrícolas, gandeiras e forestais e conseguir unha economía sostible e respectuosa como medio natural na Unión Europea, tal e como se sinala no Pacto Verde Europeo. Un exemplo deste tipo de actuacións son as Sociedades Agrarias de Transformación (SAT). O anterior presenta unha maior importancia cando a presencia cuantitativa e cualitativa do sector primario é elevado, como ocorre en Galicia. Na nosa CA, o peso do sector agrario no Valor Engadido Bruto (VAB) e no emprego representa o 3,4 % e o 3,8 % respectivamente (López-Iglesias, 2019). Esta porcentaxe sería do 6,9 % se consideramos o sector agroalimentario. Asemade, o sector primario resulta vital para mitigar o proceso de despoboamento da Galicia interior e frear a polarización económica cara a Galicia do litoral; ao anterior hai que engadir do papel que pode exercer para a conservación do medio natural (Informe Ardán, 2020, 2021). En consecuencia, compre abordar o papel das SAT en Galicia como entidades da Economía Social (ES). Para iso, o esquema que seguirá será o seguinte. Tras esta introdución, o segundo apartado aborda o concepto e características destas entidades. A continuación, realizase a través dunha análise comparada, o estudo das SAT en Galicia. Posteriormente se sinalan un conxunto de recomendacións. Finaliza este estudo cunha serie de conclusións.